Këto ditë Kosovën do ta vizitojë një delegacion faktmbledhës për investime i nivelit të lartë nga Emiratet e Bashkuara Arabe. Ky delegacion përbëhet nga përfaqësues të sektorit publik dhe atij privat dhe do të qëndrojnë në Kosovë nga datat 2-5 nëntor.

Qëllimi i vizitës së këtij delegacioni, sipas zyrës së presidentes së Kosovës, është për t’u njoftuar me mundësitë dhe potencialet investuese në Kosovë.

“Delegacioni i EBA do të zhvillojë takime me Presidenten Jahjaga, Kryeministrin Thaçi, përfaqësues më të lartë të Qeverisë së Kosovës, institucioneve të pavarura ekonomike dhe përfaqësues të sektorit privat të Kosovës”, thuhet në njoftimin për media të Presidencës.

Kjo vizitë vjen si rezultat i takimit të fundit të Jahjagës me Princin e Kurorës Sheikh Mohammed bin Zayed Al Nahyan, me të cilin ka biseduar për thellimin e bashkëpunimit ekonomik dhe për investimin e EBA në Kosovë në fusha të ndryshme.