Analisiti Arben Ahmeti thotë se meqë vendi po hynë në javën vendimtare të daljes nga ngërçi, një element nuk duhet harruar.

“Ramush Haradinaj është barka e shpëtimit të Isa Mustafës. Kësisoj, do të ishte e pamoralshme që kreu i LDK-së ta braktis këtë barkë, tash pasi që Haradinaj e shpëtoi nga dorëheqja prej LDK-së”, ka thënë Ahmeti për Indeksonline.

Sipas tij, Isa Mustafa e ka të pamundur të përballet me komandantët që priten të jenë problem i qeverisjes së ardhshme për shkak të Gjykatës Speciale, me sundimin e ligjit që duhet të vendoset por mbi të gjitha me opozitën e PDK-së, për shkak të qeverisjes që e ka bërë në Prishtinë.

“Të trija këto mundësi, lideri i LDK-së i sheh tek ai i AAK-së Ramush Haradinaj. Kur kësaj iu shtua edhe nevoja që të evitoj dorëheqjen që i kërkohej prej kryetarllekut, Isa Mustafa ia mësyu selisë së AAK-së, për ta vendosur Haradinajn në krye të një beteje që do ta çonte Thaçin në opozitë dhe do ta shpëtonte Mustafën nga dorëheqja duke e bërë kryeparlamentar”, thotë Ajmeti.

Tutje ai shton se kalkulimi, ka dal të jetë i saktë, pos në pikën për kryeparlamentar.

“Dështimi në këtë pikë, nuk i jep të drejtë morale Mustafës që tash kur i ka ikur rrezikut të dorëheqjes, ta braktis Haradinajn. Një zhvillim i tillë do të ishte i ngjashëm me atë udhëtarin që posa e kalon lumin i bie shkelm gomarit”, ka thënë në fund Ahmeti. /Indeksonline/