“Shkarkimi i ministrit Rexhepi do të parandalonte korrupsionin në MPB, e cila është vlerësuar si ministria më korruptuar e Qeverisë, e cila është përgjegjëse për luftimin e korrupsionit” është shprehur deputeti i Lëvizjes Vetëvendosje, Rexhep Selimi.

Selimi i cili është shprehur se skandalet në këtë ministri janë të panumërta ka thënë se duhet pasur parasysh dëmtimin e procesit të liberalizimit të vizave për shkak të skandalit të pasaportave biometrike.

Ai ka folur edhe për urdhërin verbal të ministrit Rexhepi për të arrestuar aktivistët e Vetëvendosjes dhe pastaj dhunën policore ndaj protestuesve, duke përfshirë edhe disa deputetë.

Ai ka përmendur edhe rastin e kunatës së aktivistet , Albulena Haxhiu, Iris K. e cila vazhdon të jetë në gjendje kome.

Përndryshe Rexhepi, në interpelancën para deputetëve të Kuvendit të Kosovës, nuk ka pranuar të flasë për akuzat e bëra nga Lëvizja Vetëvendosje, e cila kishte iniciuar këtë interpelancë dhe ka kërkuar dorëheqjen e tij.

Ministri Rexhepi ka dhënë detaje rreth procesit të hetimeve rreth skandalit të pasaportave biometrike, ndërsa ka deklaruar se kishin kërkuar nga Prokuroria e Shtetit dhe EULEX-i që të hetojë rastin, ndërsa MPB-ja ka bashkëpunuar për të ofruar dokumente.