Grupi për Studime Juridike dhe Politike i ka bërë thirrje Qeverisë së Kosovës që të përshpejtojë dinamikën e zbatimit të kushteve për procesin e liberalizimit të vizave. Organizata ka prezantuar të shtunën një analizë të titulluar:  “Një matricë vlerësimi mbi të arriturat dhe sfidat e Kosovës në përmbushjen e Udhërrëfyesit për liberalizimin e vizave”, ku puna e institucioneve të Kosovës në lidhje me arritjet në përmbushjen e objektivave të Udhërrëfyesit të liberalizimit të vizave është vlerësuar me notën 3.5, gjë e cila nënkupton që Kosova ka ende shumë objektiva për të përmbushur.“Procesi i liberalizimit të vizave në Kosovë duhet të jetë prioritet më themelor i Qeverisë dhe ajo duhet të rrisë dinamikën në zbatimin e kushteve, sepse ajo është e ulët”, ka thënë Fisnik Korenica, drejtues i organizatës që ka nxjerrë analizën.