Një punë e madhe dhe e mundimshme është bërë derisa kanë mbërritur në këtë moment. Mbetjet e viktimave të luftës së fundit, pasi janë identifikuar, po futen në arkivolet e mbuluar me flamujt kuq e zi. Punëtorët e Institutit të Mjekësisë Ligjore po i bëjnë gati që mbetjet t’u shkojnë Familjarëve që janë nga Suhareka dhe Krusha e Vogël e Rahovecit.

Të hënën dhe të martën, familjarët e të identifikuarve do të vizitojnë Institutin për përfundimin e procedurave, para se të dërgohen për rivarrim.

Në mesin e viktimave që janë identifikuar janë edhe katër fëmijë të vrarë në vitin 1999, ka thënë Arsim Gërxhaliu, drejtor i I institut për Mjekësi Ligjore .

Në komunën e Suharekës mbesin edhe më shumë se 100 të pagjetur, derisa varrimi i të identifikuarve do të bëhet më 26 mars. Kjo datë përkon edhe me përvjetorin e masakrës së vitit 99 në këtë komunë, ku u vranë 50 persona, 47 nga ta të familjes Berisha.

E Krusha e Vogël e Rahovecit pret të marrë vesh për fatin e 86 banorëve të saj, ndërsa në mbarë Kosovën mbesin mbi 1700 të pagjetur.