Sa herë që i vinin mysafirë në rezidencën e tij, në fund të takimit nxirrte nga gjepi një faculetë të bardhë me stemën e presidentit të Kosovës, me të cilën mbështillte copëza gurësh të çmuar të nxjerrë nga nëntoka e vendit tonë. Këtë e bënte edhe kur udhëtonte jashtë vendit në vizita zyrtare.

Kur në Kosovë erdhi ish-presidenti i Shteteve të Bashkuara të Amerikës, Bill Klinton, për të përuruar shtatoren e tij në vitin 2009, kujtoi diçka shumë të veçantë që kishte marrë nga Kosova, shkruan “Tribuna”.

Duke folur para masës së mbledhur në sheshin që mban emrin e tij në qendër të Prishtinës, Klinton nuk la pa përmendur presidentin e ndjerë historik të Kosovës, Ibrahim Rugovën. Ish-presidenti amerikan kujtoi gurët e çmuar që i kishte marrë si dhuratë nga Rugova, kur ky i fundit kishte qenë në një vizitë në Shtëpinë e Bardhë në Uashington.

Këta gurë tani më veçse kanë krijuar emrin e tyre, ‘Gurët e Rugovës’.

Njëjtë e kishte kujtuar edhe ish-kryeministri i Britanisë së Madhe, Toni Bler, në një vizitë të tij në vendin tonë, ndërkohë që sa herë që vinin diplomatë e politikanë të huaj për vizita në Kosovë, Rugova vazhdonte traditën e dhënies së gurëve si dhuratë. Por ky gjest nuk e kishte vetëm simbolikën e dhuratës. Gurët si dhuratë përbënin një filozofi të gjeniut të letërsisë. /Tribuna/