Forumi Ekonomik Botëror publikoi raportin për rreziqet globale që na kërcënojnë në këtë vit. Në këtë listë gjenden rreziqet e natyrës ekonomike, por edhe ato që janë të lidhura me ekologjinë dhe ndryshimet klimatike, transmeton Telegrafi.

1. Kriza fiskale në ekonomitë kryesore botërore

Kriza fiskale paraqitet si rreziku më i madh i vitit 2014. Ekonomitë e mëdha janë të rrezikuara, ndërsa shumë tregje më të vogla vitet e fundit shënojnë rritje që mund të shtojnë vajë në zjarrin e krizës financiare. Kriza në disa prej ekonomive të mëdha lehtë mund të ketë ndikim global.

2. Papunësia e lartë

Për të gjetur punë është vështirë si në ekonomitë e mëdha, ashtu edhe në ato të vogla. Papunësia po prek kryesisht të rinjtë. Në disa shtete papunësia tek rinjtë ka tejkaluar 50 përqindëshin, ndërsa problem të madh paraqet “nënpunësimi” ose punësimin i të rinjve në pozitat për të cilat ata janë shumë të kualifikuar e ku kryesisht merren me punë të cilësisë së ulët.

3. Mungesa e ujit

Shumë probleme mjedisore janë në këtë listë, e në mesin e tyre rreziku më i madh është problemi i ujit, si pasojë e keqmenaxhimit me burime të pakta, e po ashtu si pasojë e konkurrencës së tepruar në treg.

4. Disproporcioni në paga

Efekti të cilin kriza financiare e ka në fuqinë blerëse të klasës së mesme në sistemet e mëdha ekonomike, në kombinim me polarizimin e të ardhurave në ekonomitë më të vogla, paraqet një tjetër rrezik që na kërcënon më 2014.

5. Mungesa e ushqimit

Ky rrezik është i lidhur ngushtë me ndryshimin e klimës dhe fenomeneve ekstreme të motit, për shkak të të cilave burimet ushqimit kualitativ dhe të mjaftueshëm do të bëhen jo lehtë të kapshme.

6. Moti ekstrem

Si pasojë e ndryshimeve të përmendura klimatike, ndodhin gjithnjë e më shpesh e fenomene ekstreme të motit, si thatësira apo përmbytje tl mëdha. Ngjarjet e tilla më 2014 do të mund të çojnë në një rrezik të madh të sigurisë, si: mungesa e ushqimit dhe paqëndrueshmëria politike dhe shoqërore .

7. Rënia e sistemit të qeverisjes globale

Rreziku më i madh ndërlidhet me të gjitha rreziqet tjera të përmendura në këtë raport. Institucionet e dobëta ose të papërshtatshme globale, në kombinim me interesat e ndryshme politike nacionalem mund të përbëjnë pengesë për bashkëpunim në trajtimin e rreziqeve globale.

8. Mos përshtatja me ndryshimet klimatike

Derisa me vite të tëra bëhet thirrje për masat që do të ulnin emetimin e gazrave, tani është e domosdoshme që të përshtatemi me ndryshimet klimatike që kanë ndodhur. Dështimi për t’iu përshtatur këtyre ndryshimeve më së shumti dëmton shtetet e zhvilluara.

9. Kolapsi i institucioneve të mëdha financiare

Pesë vite pas rënies së “Lehman Brothers”, shumë kanë frikë nga stabiliteti i bankave. Kjo bankë e investimeve bankrotoi më 2008, por ka një mundësi që ky skenar të përsëritet këtë vit tek institucionet tjera financiare.

10. Trazirat politike dhe shoqërore

Trazirat në nivelin shoqëror ose politik në disa vende mund të shkaktojnë humbje të besimit në mes të qytetarëve dhe shtetit, të cilat përfundimisht do të çojnë në dhunë të brendshme, paqëndrueshmëri globale, kolaps të shtetit e madje edhe konfliktit ushtarak.