AKR-ja, dega në Gjakovë, ka akuzuar sot në një konferencë për media kryetarin e komunës, Pal Lekaj për keqpërdorim dhe keqmenaxhim të pronës publike në Gjakovë.

Sipas AKR-së, qytetarët e Gjakovës në vazhdimësi po përballen me mungesë të transparencës dhe llogaridhënies së institucioneve lokale në Gjakovë.

“Çështja më problematike që ka karakterizuar punën e kësaj qeverie lokale, por edhe qeverive të mëhershme, kanë qenë pronat shoqërore komunale;  fatkeqësisht ende edhe sot nuk e kemi një listë nga Komuna e Gjakovës për pronat që i posedon ajo. Përkundër kërkesës sonë të vazhdueshme që të bëhen publike pronat që i takojnë Komunës së Gjakovës të cilat duhet të jenë në menaxhim të Komunës, Kryetari Pal Lekaj, së bashku me qeverinë e tij lokale, vazhdojnë vetëm të heshtin”, thuhet në komunikatën e për mediat të AKR-së, dega në Gjakovë.

Kjo heshtje, sipas AKR-së, shton dyshimet e qytetarëve të Komunës së Gjakovës se po vazhdon keqpërdorimi dhe keqmenaxhimi i pronës publike.

“Së fundmi disa qytetarë, duke e parë zinxhirin e bashkëpunimit në mes të zyrtarëve komunalë dhe organeve të drejtesisë, kanë vendosur të na sjellin disa fakte në të cilat dyshohet se ka uzurpime të pronave dhe ndërrim të destinimit të tyre. Fundja nuk është më e rëndësishme rrjedhja e informatës se sa trajtimi i një dukurie që në vazhdimësi po ndodh në Gjakovë”, thekson tutje AKR.

Më pas kjo parti ka përmendur disa nga projektet që kanë mbetur pa përfunduar në Komunën e Gjakovës, duke filuar nga projekti i vitit 1985 i quajtur Komasacionit që kishte mbetur pa u perfunduar në fshatrat e Komunës se  Gjakovës, ndërsa në vitin 2008 kishte filluar bartja e palujteshmërive nga Komasacioni në gjendje kadastrale në këto fshatra: Novosellë e Ultë, Janosh, Trakaniq, Osek Pashë, Rogovë e Hasit. Ky projekt është finacuar nga Ministria e Bujqësisë dhe gjatë këtij procesi ka pasur shumë pa rregullsi me pronën shoqërore.

Në zonën kadastrale Trakaniq (ZKT) është shpronësuar Kooperativa bujqësore me sipërfaqe 12Ha 81Ari 51m, dhe janë shndërruar në pronë ndërtimore në bazë të fletëposedimit nr: UL-70705075-00084 e azhuruar me 24.10.20012. Në fletëposedimin me nr.84 i azhuruar ne vitin 1982 dhe skicën e vitit 1985 parcela me nr.1, pronë e K.B.I. `ERENIKU`; parcela me nr.2,  fushë sporti e ish-klubit futbollistik `DUKAGJINI`; parcelat me nr.3 dhe 7, prona shoqrore; kanë pasur destinimin si tokë bujqësore e zbërthyer si ara, kullosa etj., ndërsa në fletëposedimin me të njëjtin numër, por të azhuruar në vitin 2012 del se parcela me nr.1, pronë e K.B.I `Ereniku` dhe parcela me nr.2  janë pronë ndërtimore, kurse më e keqja qëndron se parcelat me nr.3 dhe nr.7 nuk janë të paraqitura fare. Përpara kam dy skicat e vitit 1985 dhe vitit 2009 ku shihet qartë dallimi që parcela me nr.7, tash me nr.1007/1/2/3 sipas skicës së vitit 2009, është shpërndarë në tre pronarë. Në vitin 2001-2002 Kuvendi Komunal i Gjakovës ka nxjerrë një vendim për shpronësimin e të gjitha pronave shoqërore dhe private brenda rrethojave të Aeroportit të Gjakovës dhe t`i bartë të gjitha kompenzimet, mirëpo në bazë të një procesverbali të vitit 2008, që po ashtu e posedojmë, qytetari dyshon se parcela me nr.2 është bartur brenda rrethojave të Aeroportit. Ky  procesverbal i shiqimit publik, i përpiluar vetëm me emrat e perfaqësuesve  të fshatit, i  pavulosur dhe i panënshkruar nga këta përfaqëues, ka bartë paluajetshmerinë brenda  Aeroportit të Gjakovës në vitin 2008, apo 6 vite pas shpronësimit të pronave shoqërore në bobi të Aeroportit. Në bazë të ligjit për komasacione, pala në procedurë është dashur të ftohet që të marrë pjesë në shiqim publik në bazë të nenit 55 të ligjit për komasacion, ku në këtë rast ka munguar, ashtu sikur ka munguar edhe zyrtari për çështje pronësore dhe juridike dhe për më keq, parcelën me nr.2 e ka bartur në zonën e Aeroportit pronat e të cilit janë shpronësuar qysh në vitin 2002.

Për t`i vërtetuar të gjitha këto dyshime, ne si subjekt politik i kemi drejtuar kërkesë Drejtorisë për Gjeodezi, Kadastër dhe Pronë, ku kemi kërkuar me shkrim fletëposedimet për tri parcelat e dyshuara 1007/1,2,3 si dhe informata në lidhje me ndryshimet që vrehen në skicat e vitit 1985 dhe 2009 si dhe në fletëposedimet e vitit 1982 dhe 2010.

Fatkeqësisht Drejtoria per Gjeodezi, Kadastër dhe Pronë nuk e ka parë të arsyeshme të na përgjigjet andaj ne si parti politike kemi vendosur që këto dyshime dhe këtë problematikë, që është bërë trend i qeverisjes lokale në Gjakovë, ta ngrisim në media. Jemi të vetëdijshëm që Komuna e Gjakovës, si çdo herë tjetër, do të arsytohet me qëndrimet tashmë të njohura se është kohë fushate, se ka prapapavijë politike etj., por ne edhe një herë i bëjmë thirrje publike Kryetarit të Komunës Pal Lekaj që të heqë dorë nga regjimi dhe kufizimi që ka instaluar për informimin e qytetarëve. Çdo kush e gëzon të drejtën të informohet për pronën shoqërore, andaj nëse vazhdon t`i konsiderojë argumentet që na ka ofruar qytetari si të qëllimshme dhe për shërbime politike, le të urdhëron ta dëshmojë të kundërtën me fakte dhe argumente, ashtu sikur po bjëmë edhe ne sot.

“AKR-ja nuk do të heshtë dhe nuk do të tregohet e verbër asnjëherë përpara të bëmave të Komunës. Jemi të vetëdijshëm se e gjithë kjo paraqet një sfidë për ne dhe qytetarët, por jemi të vendosur që të vazhdojmë më tutje së bashku në mënyrë që të zbardhim keqpërdorimet tjera”, thuhet në fund të njoftimit nga konferenca për media e AKR-së.