Pyllëzimi i pyjeve në Kosovë do të jetë një mision i pamundur për institucionet gjegjëse marrë parasysh ritmin e zhveshjes ilegale të tyre. Se situata është alarmante kjo është dëshmuar edhe në Komisioni parlamentar për bujqësi të kryesuar nga kryetari Nait Hasani, në të cilën është diskutuar raporti i agjensionit të pyjeve. Gjykuar nga shifrat e referuara nga kreu i agjencionit, pyjet në Kosovë janë duke u masakruar në mënyrë të pamëshirshme. Ndërsa dënimet nga ana e Gjykatave si masë preventive për parandalimin e tyre duken mjaft të zbehta. Mbrojtja e pyjeve vitin 2012 ka kaluar si kompetencë e e deleguar nga autoriteti qendror tek autoritetet komunale.

Edhe pse agjensioni vitin e kaluar ka përgatitur një plan operacional për mbrojtjen e pyjeve nga prerjet ilegale, sëmundjet dhe shfrytëzimi i tyre, duket se nuk ka dhënë frutat e duhura. Vetëm gjatë vitit të kaluar vlera e dëmit të shkaktuar nga prerjet ilegale ka qenë diku 24 mijë metra kub ndërsa janë konfiskuar 4.666 metra kub masë drunore. Megjithatë disa besojnë se këto shifra janë edhe më të larta. Kreu i agjensionit Ahmet Zejnullahu ka prezantuar disa shifra që kanë të bëjnë me denoncimet gjatë vitit të kaluar për të cilat ka kritikuar politikat ndëshkimore të gjykatave. ‘Shqyrtimi i lëndëve nga sektori i pylltarisë ende mbetet brengë e madhe dhe po ashtu nganjëherë fitohet përshtypja se dënimet më tepër janë stimuluese sesa ndëshkuese’, ka thënë Zejnullahu.