Në Maqedoni janë shtuar zërat për zgjedhje të parakohshme parlamentare në pako me zgjedhjet lokale të marsit të 2013.

Burime pranë diplomatëve evroperëndimor në Shkup i thanë agjencisë së lajmeve INA se janë dy skenare akoma të padeshifruara për shpalljen e zgjedhjeve të parakohshme, ndërsa mëdyshjet janë se si hartues të planit janë dy partitë e koalicionit VMRO-DPMNE, por pjesërisht edhe BDI.
“Ka shumë sinjale që nxjerrin një konstatim se partnerët e koalicionit kanë krijuar një situatë të tillë të përgaditjes së terrenit për zgjedhjet e parakohshme në pako me ato lokale. Homazhet në varrezat e dëshmorëve në Sllupçan nga ministri i mbrojtjes Fatmir Besimi dhe pjestarët e ARM si dhe Ligji për përkujdesje për ish-pjestarët e forcave maqedonase të sigurisë nga VMRO-DPMNE janë dy veprimet që nxitën tensionet brenda koalicionit qeverisës, duke njxerrë në sipërfaqe reagimet për shpërbërjen e koalicionit dhe çuarjen e vendit në zgjedhje të parakohshme. Por, megjithatë situata do akoma një analizë se cili është veprimi i BDI-së në këtë rast dhe se a bëhet fjalë për ndonjë marrëveshje midis Ahmetit dhe Gruevskit”, theksoi për INA, një burim diplomatësh perëndimor.
Skenari i dytë është se vetë Gruevski ka ndërmarrë vendimin për të shkuar në zgjedhje, për tu ballafaquar me liderin e opozitës Branko Cërvenkovski, duke luajtur vetëm një kartën nacionaliste. Kryetari i VMRO-DPMNE përmes Ligjit për përkujdesje institucionale për pjestarët e forcave të sigurisë pjesëmarrës në konfliktin e 2001 synon të përfitojë shumicën e votave duke siguruar maxhorancë stabile sërish prej mbi 60 deputetëve.
Janë me mijëra maqedonas që në konfliktin e vitit 2001 ishin pjesë e forcave rezerve të Ministrisë së Punëve të Brendshme (MPB) dhe Armatës së Maqedonisë (ARM). Ata do të gëzojnë një mbështetje dhe status special me miratimin e ligjit, që përjashton zgjidhjen e statusit të ish-pjesëtarëve të UÇK-së.
Në vazhdën e këtyre zhvillimeve të tensionuara politike në Shkup po qëndron zëvendës-ndihmës sekretari amerikan Filip Riker, i njohur si ish-ambasador amerikan dhe njohës i zhvillimeve politike në Maqedoni.
Kryetari i BDI-së, Ali Ahmeti dje pas takimit me Riker ka theksuar se akoma nuk kanë shqyrtuar pozicionet partiake dhe marrëveshja e koalicionit, pas situatës së krijuar tensionuese me VMRO-DPMNE.
Ditëve të ardhshme pritet të qartësohen pozicionet midis VMRO-DPMNE dhe BDI, për vazhdimin e koalicionimit apo duke çuar vendin drejt zgjedhjeve të parakohshme. (INA)