Dy banesa në qendër të Podujevës janë djegur tërësisht të premten. Sipas zyrtarëve të Shërbimit të Zjarrfikësve dhe Shpëtimit, pos mureve asgjë tjetër nuk ka mbetur pa u djegur në këto dy banesa të pronarëve S. Hoxha e A. Gërguri. Për fat të mira, pasoja në njerëz nuk ka pasur, njofton koha.

“Rreth orës 10 e 47 minuta, një qytetar na ka njoftuar se në qendër të Podujevës është duke dalë tym. Ekipi i zjarrfikësve ka dalë menjëherë në vendin e ngjarjes dhe kemi konstatuar se dy banesa janë duke u djegur. Na janë dashur tri orë rresht të punojmë me intensitet për të lokalizuar zjarrin, ndërsa një ekip është duke vazhduar të qëndrojë aty për të monitoruar situatën”, ka thënë shefi i Shërbimit të Zjarrfikësve dhe Shpëtimit në Podujevë, Milaim Ajvazi.

Sipas tij, në ndihmë u ka dalë edhe një ekip i zjarrfikësve nga Prishtina.

“Të dy banesat janë djegur rëndë dhe pos mureve asgjë tjetër nuk ka shpëtuar pa u djegur. Por, për fat të mirë nuk kemi pasoja në njerëz”, ka thënë ai.

Shkaku që çoi në djegien e këto dy banesave në Podujevë ende nuk dihet./Indeksonline/