BDI dhe PDSH edhe sot kanë vazhduar përplasjet me akuza lidhur me ate se cila prej tyre është fajtore për realizimin e projektit “Shkupi 2014”.

Sekretari i përgjithshëm i BDI-së, Abdilaqim Ademi sot në një konferencë të organizuar me gazetarët ka theksuar se PDSH-ja është bashkautorë e projektit “Shkupit 2014”.

“Shqiptarët e dinë shumë mirë se autori ekskluziv i projektit ‘Shkupi 2014’ është PDSH-ja gjatë qeverisjes së paligjshme dhe drejtimit të Ministrisë së Kulturës nga Arifhikmet Xhemaili”, deklaroi sekretari i përgjithshëm Ademi.

Sipas tij, veprimet e PDSH-së janë të njohura dhe se ato tradicionalisht i kanë sjellur dëme shqiptarëve në Maqedoni.

Sekretari i përgjithshëm i BDI-së, Abdilaqim Ademi ka akuzuar PDSH-në edhe për qeverisjen e saj me VMRO-DPMNE gjatë vitit 2006.

“Shqiptarët asnjëherë nuk do ta harrojnë uzurpimin 16 mujor të institucioneve shtetërore nga ana e PDSH-së, pa vullnetin e shqiptarëve, si dhe dështimin e tyre në këtë qeverisje. Asnjëherë nuk harrohen moratoriumi për çështjet etnike,  mosnjohja e Kosovës, instalimi i regjimit me viza me Shqipërinë, respektimi i marrëveshjes Serbi – Maqedoni mbi kufirin e Kosovës, mosrealizimi i demarkacionit, abrogimi i Ligjit për Flamur, inferioriteti dhe serviliteti ekstrem, gërmimet politike në Kalanë e Shkupit dhe shumë padrejtësi institucionale ndaj shqiptarëve”, theksoi Ademi.

Nga ana tjetër, PDSH është kundërpërgjigjur për projektin “Shkupi 2014” dhe realizimin e busteve të Aleksandërit të Madh dhe të Skënderbeut në Shkup.

Deputeti dhe sekretari organizativ i PDSH-së, Bekim Fazliu ka theksuar se sa i përket vendosjes së përmendores së Skënderbeut, dhënien e lejes e ka bërë PDSH në kuadër të Qytetit të Shkupit gjatë qeverisjes së saj në kryeqendër si partnere e koalicionit me një nga partitë maqedonase.

“PDSH-ja mban vulën dhe realizimin e shtëpisë së Nënë Terezës, Institutin për trashëgimi kulturore dhe shpirtërorë të shqiptarëve dhe dhënien e lejes për vendosjen e përmendores së Skënderbeut në Shkup. Projekte tanimë të prekshme dhe jo premtime boshe të tipit Ali Ahmetjan -BDI, që prej 2010-ës shesin pallavra se do vendosin edhe 2-3 figura të shqiptarëve në shesh të Shkupi, por që shqiptarët nuk i shohin askund, kjo i ngjan hapjes së pikës kufitare Llojan-Miratoc”, theksoi Bekim Fazliu.

Ai ka komentuar edhe deklaratën e kreut të BDI-së, Ali Ahmeti lidhur me vendosjen e bustit të Aleksandërit të Madh.

Sipas Fazliut, Ahmeti ka deklaruar se vendimi për vendosjen e Aleksandërit të Madh është marrë gjatë qeverisjes BDI dhe LSDM, e cila tashmë është në opozitë.

“Dmth sipas Aliut, Aleksandrin e ideoi me LSDM-në, ndërsa e realizoi me VMRO-në. Pra emërues i përbashkët i diskriminimit të shqiptarëve në Maqedoni është çdoherë Ali Ahmeti, i cili herë është me Cërvenkovskin e herë me Gruevskin dhe asnjëherë me shqiptarët”, theksoi deputeti Fazliu, duke pyetur se me cilën parti BDI ideoi përmendoret e sllavomaqedonasve tjerë të vendosur në sheshin e Shkupit. (INA)